Policia e Durrësit ka arrestuar një persona, pasi në kamionin e tij u gjendën 11 kg heroinë.
Mësohet se sasia e drogës kishte si destinacion Italinë, ndërsa zbulimi i drogës u bë gjatë skanimit të kamionit në Portin e Durrësit.
Heroina e cila u sekuestrua nga policia ishte e fshehur në kabinën e automjetit, ndërsa sipas informacioneve të deri tanishme kamioni në momentin e skanimit ishte i ngarkuar me konfeksione.
Drejtuesi i mjetit është identifikuar si Bujar Shazivari, 63 vjeç, banues në Durrës, i cili po merret në pyetje në ambjentet e komisariatit të Durrësit.
Njoftimi i policisë
Policia Kufitare e Portit Durrës godet një tjetër tentativë të trafikut ndërkombëtar të drogave të forta.
Sekuestrohen rreth 11 kilogramë lëndë narkotike e dyshuar Heroinë.
Arrestohet në flagrancë poseduesi i lëndës narkotike.
Gjetja e lëndës narkotike gjatë kontrollit në vijë të dytë nga Policia Kufitare.
Kontrolli i imtësishëm mbi bazën e informacioneve të Policisë Kufitare në bashkëpunim me DVP.Durrës dhe agjensitë e tjera ligjzbatuese.
Me datë 11.02.2018, shërbimet e Policisë Kufitare të Portit Durrës, në vijim të kontrrolleve intensive për parandalimin dhe goditjen e trafikut të lëndëve narkotike, si dhe bazuar në informacionet e marra në rrugë operative në bashkëpunim me agjensitë e tjera ligjzbatuese gjatë kontrollit në vijën e dytë të kamionave rezultoi se:
Në kabinën e kamionit “MAN”, me targë AA 943 OO nën krevatin e shoferit në një vend të fshehtë pas kontrollit të imtësishëm me qenin antidrogë dhe fibroskop u gjetën disa pako me lëndë të dyshuar Heroinë.
Kamioni drejtohej nga shtetasi Bujar Shazivari, 63 vjeç, banues në Durrës.
Në vendngjarje ka mbërritur grupi hetimor dhe specialistët e Sektorit të Hetimit të Narkotikëve në Drejtorinë Vendore të Policisë Durrës.
Nga kontrolli i imtësishëm u gjetën 10 pako të mëdha dhe një pako e vogël ku brenda tyre kishte lëndë narkotike të dyshuar Heroinë, ku është sekuestruar në cilësinë e provës materiale ku do kryhet dhe peshimi i plotë i saj.
Kamioni me ngarkesë 15 koli me qese plasmasi me destinacion Firenzze-Itali.
Grupi hetimor po vijon punën për zbardhjen e plotë të kësaj ngjarje, identifikimin dhe kapjen e personave të tjerë të përfshirë në këtë trafik.
Njëkohësisht është shkëmbyer informacion në kohë reale me homologët Italianë për të zhvilluar hetime të përbashkëta në lidhje me këtë rast.
